काठमाडौं । सशस्त्र प्रहरी बल, नेपालले २४ औँ सशस्त्र प्रहरी दिवसको अवसरमा पूर्व नायव महानिरीक्षक (डीआईजी) नवराज विष्टलाई ‘एपीएफ लाइफ टाइम अचिभमेन्ट अवार्ड’ प्रदान गरेको छ। बुधबार सशस्त्र प्रहरी प्रधान कार्यालय, हल्चोकमा आयोजित विशेष समारोहमा गृहमन्त्री रमेश लेखक र सशस्त्र प्रहरी महानिरीक्षक राजु अर्यालले विष्टलाई अवार्ड प्रदान गरे।
कार्यक्रममा सशस्त्र प्रहरी बल नं ३ गढीमाई बाहिनी मुख्यालय मकवानपुरलाई यस वर्षको ‘उत्कृष्ट बाहिनी अवार्ड’ प्रदान गरिएको छ। बाहिनीपति डीआईजी गणेश बहादुर ठाडा मगरले उक्त अवार्ड ग्रहण गरे। ठाडा मगरको नेतृत्वमा यसअघि २०७८ सालमा नं २ छिन्नमस्ता बाहिनी मुख्यालय महोत्तरीले पनि उत्कृष्ट बाहिनीको उपाधि प्राप्त गरेको थियो।
सो क्रममा गृहमन्त्री लेखकले सशस्त्र प्रहरी बलको योगदानको प्रशंसा गर्दै राष्ट्रिय सुरक्षादेखि आपत्कालीन उद्धारसम्मका कार्यमा यस संस्थाले खेलेको भूमिकालाई महत्त्वपूर्ण रहेको बताए।
