पर्सा । बाराका प्रहरी भान्से राजकुमार रुम्बाको हत्याका प्रकरणमा संलग्न राष्ट्रिय अनुसन्धान विभाग बाराका इन्स्पेक्टर श्रीकान्त तिवारीसहित तीन जना पक्राउ परेका छन् ।
भान्से रुम्बालाई गोली प्रहार गरी हत्या गरिएको घटनामा तीन जना पक्राउ परेसँगै प्रहरी अनुसन्धान साँघुरिँदै गएको प्रहरीले जनाएको छ । हत्यामा संलग्न अन्य दुई जना पनि बारा जिल्लाको इनर्वा सिराको रहेको प्रहरीले जनाएको छ ।
बाँकी दुई जनाको नाममा भने अनुसन्धान जारी नै रहेकोले प्रहरी अझै गोप्य राखेको छ । प्रहरीको विशेष टोलीले तीनै जनासँग गरेको सोधपुछ र बयान तथा घटनासँग सम्बन्धित सबुत प्रमाण फेला परेको प्रहरीले जनाएको छ ।
भान्से रुम्बालाई गत शनिबार बारामा प्रहरीका गोली हानी हत्या गरिएको थियो ।
