मकवानपुर । जिल्ला प्रहरी कार्यालय मकवानपुरले कात्तिक ७ गते हेटौँडा उपमहानगरपालिका वडा नं. ८ कमाने बस्ने वर्ष ४२ को सन्तोष अधिकारीको घरबाट सुनका गरगहना, नगद तथा मोबाईल समेत चोरी भएको घटनामा संलग्न व्यक्तिको खोजतलासको गर्ने क्रममा दुईजनालाई पक्राउ गरिएको शुक्रबार जारी विज्ञप्तिमा उल्लेख छ ।
हेटौँडा– १५ घर भई वडा नं. ४ भैरवरोडस्थितमा कोठा भाडा लिई बस्ने वर्ष २४ को मनोज पुलामी मगरलाई पक्राउ गरिएको मकवानपुर प्रहरीका प्रमुख एसपी विश्वराज खड्काले बताए ।
मनोजलाई फेला पारी चोरी भएको घटना सम्बन्धमा सोधपुछ गर्दा चोरीका गरगहना नगद र मोबाईलमध्ये केहि सुनका गरगहना हेटौँडा– ७ नागस्वतीस्थित शिवशक्ति सुनचाँदी पसलका संचालक वर्ष २५ को धिरज विश्वकर्मालाई पनि पक्राउ गरिएको एसपी खड्काले बताए ।
चोरी भएका सुनका गरगहना मनोजले धिरजलाई बिक्री गरेको अनुसनधानबाट खुलेको छ । सुनका गरगहनासहितका सामान चोरी गर्ने मनोज र खरिद गर्ने धिरतलाई कात्तिक २९ गते पक्राउ गरी मकवानपुर जिल्ला अदालत हेटौँडामा पेश गरिएको छ । अदालतबाट उनीहरूविरुद्ध ७ दिनको म्याद अनुमति लिई थप अनुसन्धान भइरहेको छ ।
