काठमाडौं । उपप्रधान एवम् अर्थ मन्त्री विष्णुप्रसाद पौडेल, परराष्ट्र मन्त्री डा. आरजु राणा देउवा, ऊर्जा, जलस्रोत तथा सिँचाई मन्त्री दीपक खड्का र श्रम, रोजगार तथा सामाजिक सुरक्षा मन्त्री शरद सिंह भण्डारीविरुद्ध उजुरी परेको हो । युवराज सफलले बिहीबार अख्तियारमा उनीहरुविरुद्ध उजुरी दिएका हुन् ।
उजुरीमा विभिन्न काण्डमा मुछिएका व्यक्तिहरू मन्त्री बन्न योग्य नभएको जिकिर गरिएको छ । अर्थमन्त्री पौडेलको सम्पत्ति छानबिन हुनुपर्ने माग उजुरीमा गरिएको छ । उनीमाथि ललिता निवास, सुकुम्वासी जग्गा लगायतका जग्गा प्रकरणमा मुछिएको आरोप लगाइएको छ ।
यस्तै नक्कली भुटानी शरणार्थी प्रकरणमा के कति कारणले आरजु राणा देउवालाई अनुसन्धानकै दायरामा नल्याई छोडिएको हो त्यो कानून सम्मत र न्यायसम्मत देखिँदैन अतः तत्काल अनुसन्धान गर्न सफलले अख्तियारको ध्यानाकर्षण गराएका छन् । ऊर्जा मन्त्री खड्कामाथि जल विद्युत् व्यवसायीलाई नै ऊर्जा मन्त्रालयको जिम्मेवारी दिँदा स्वार्थ बाझिएको भन्दै जग्गा हडपेको आरोप लागेको छ । श्रममन्त्री भण्डारीमाथि वैदेशिक रोजगारीमा जानेहरूमाथि आर्थिक भार थप्ने निर्णय गरेको र ट्राभल एजेन्सीहरूलाई पोस्ने काम गरेको आरोप छ ।
आरोपबाट सफाइ नपाउँदासम्म चारै जना मन्त्री पदमा बस्ने अवस्था नरहेको उजुरीमा उल्लेख छ । अख्तियारले आवश्यक अनुसन्धान एवम् कारबाही नगरेमा आफू सर्वोच्च अदालत गएर भए पनि आवश्यक कानूनी उपचार खोज्न बाध्य हुने सफलले बताए ।
