(ABC-Sanchar)
काठमाडौं । जनता समाजवादी पार्टी नेपाल (जसपा) अध्यक्ष उपेन्द्र यादवले आज आफ्नो पार्टीको तर्फबाट प्रधानमन्त्री प्रचण्डलाई मन्त्रीको नाम बुझाउने भएका छन् ।
वर्तमान सरकारमा दुईजना मन्त्री पाएको जसपाले शिक्षा मन्त्रीमा अशोक राइलाई पठाइसकेको छ भने अर्का एक मन्त्रीको नाम पठाउने तयारी गरेको हो । जसपाले शिक्षासहित वन मन्त्रालय पाएको थियो । वन मन्त्रीको नाम शुक्रबार बुझाइने जसपा निकट स्रोतले बताएको छ ।
बिहिबार सिंहदरबारमा बसेको संसदीय दलको बैठकमा अध्यक्ष यादवले आज या भोलीसम्म मन्त्रीको नाम प्रधानमन्त्री प्रचण्डलाई बुझाउने जानकारी गराएका थिए । हिजो नाम नपठाएपछि उनले आज मन्त्रीको नाम पठाउने तयारी गरेको जसपाका एक सांसद्ले बताए ।
मन्त्रीको नाम पठाउने विषयमा छलफल गर्नका लागि अध्यक्ष यादवले संसदीय दलको बैठक बोलाएका थिए । बैठकमा सांसदहरुले मन्त्रालय र मन्त्री चयन गर्ने जिम्मा अध्यक्ष यादवलाई दिएका थिए ।
यसअघि जसपाले संसदीय दलको नेता चयन भएपछि मात्र मन्त्री चयन गर्ने जानकारी दिएको थियो । संसदीय दलको नेता चयन नहुँदै अध्यक्ष यादवले मन्त्रीको नाम पठाउने तयारी गरेका हुन् ।
