(ABC-Sanchar)
काठमाडौं । प्रमुख राजनीतिक दलका शीर्ष नेताहरु हाल देश दौडाहमा व्यस्त छन्। आसन्न संघ र प्रदेशसभा सदस्य निर्वाचनको लागि प्रचारप्रसारको समय १० दिन मात्रै बाँकी हुँदा शीर्ष नेताहरु चुनावी प्रचारप्रसारका क्रममा देश दौडाहमा व्यस्त छन् ।
प्रधानमन्त्रीसमेत रहेका कांग्रेस सभापति शेरबहादुर देउवा झण्डै एक सातादेखि उपत्यका बाहिर छन्। कात्तिक १६ गते गृह जिल्ला डडेल्धुरा पुगेका लगातार चार दिन चुनावी सभामा व्यस्त रहे ।
डडेल्धुराका सबै स्थानीय तहमा भएका सभालाई सम्बोधन गरेर उनी हिजो साँझ मात्र धनगढी आइपुगेका छन् । उनी आज धनगढीमै हुने चुनावी सभाहरुमा व्यस्त हुने कार्यक्रम रहेको उनका प्रेस सल्लाहकार गोबिन्द परियारले जानकारी दिए ।
नेकपा एमालेका अध्यक्ष केपी शर्मा ओलीले आज पोखरा सभागृहमा हुने वृहत कार्यकर्ता भेलालाई सम्बोधन गर्दैछन् । त्यस्तै नेकपा माओवादी केन्द्रका अध्यक्ष पुष्पकमल दाहाल प्रचण्ड भने आज काठमाडौंमै व्यस्त रहने भएका छन् ।
केही दिन आफ्नो निर्वाचन क्षेत्र गोरखा २ मा पुगेर फर्किएका प्रचण्ड भोलिदेखि भने सुदूरपश्चिम र कर्णालीका जिल्लामा आयोजित चुनावी सभामा सहभागी हुने उनको सचिवालयले जनाएको छ ।
