ABC ( Sanchar) त्रिकोणात्मक टी-२० अन्तर्राष्ट्रिय क्रिकेट सिरिजमा नेपालले लगातार तेस्रो जित हात पारेको छ ।
कीर्तिपुरस्थित त्रिवि क्रिकेट मैदानमा भएको खेलमा नेपालले पपुवा न्युगिनीलाई ३७ रनले पराजित गर्दै प्रतियोगितामा लगातार तेस्रो जीत दर्ता गराएको हो । यो जित सँगै नेपाल त्रिकोणात्मक टी–२० श्रृङ्खलाको फाइनलमा प्रवेश गरेको छ ।
यसअघि सोमबार भएको पहिलो खेलमा नेपालले पपुवा न्युगिनीलाई १५ रनले पराजित गरेको थियो भने हिजो (बुधबार) भएको खेलमा मलेसियालाई ६ विकेटले पराजित गरेको थियो ।
२०४ रनको विजयी लक्ष्य पछ्याएको पपुवा न्युगिनीले निर्धारित २० ओभारमा ६ विकेट गुमाउँदै १६६ रन मात्रै जोड्यो । पपुवा न्युगिनीको लागि चार्लेस अमिनीले सार्वधिक ६२ जोडेको थिए । उनले ४७ बलमा नौ चौका प्रहार गरेका थिए ।
त्यस्तै टोनी उर्राले ४३, सेसे बाउले २५, नोरमन भनुयले १७ रन जोडेका थिए । अन्य ब्यस्टम्यानले दोहोरो अंक जोडन सकेन ।
नेपालको लागि करन केसीले पाँच, सोमपाल कामीले दुई अविनाश बोहोराले दुई र कप्तान सन्दिप लामिछानेले एक विकेट लिएका थिए ।
यसअघि टस हारेर पहिले ब्याटिङ गरेको नेपालले निर्धारित २० ओभरमा ७ विकेट गुमाएर २०३ बनाएको थियो । नेपालका लागि दीपेन्द्र सिंह ऐरीले सर्वाधिक ६६ रनको योगदान दिएका थिए ।
यसै खेलबाट टी–२० अन्तर्राष्ट्रियमा डेब्यु गरेका आदिल अन्सारीले ३१ रन, रोहित पौडेलले ४१, आसिफ शेखले ३८ र कुशल भुर्तेलले १७ रन जोडेका थिए । त्यस्तै ओपनरद्वय कुशल भुर्तेल र आसिफ शेखले पावर प्लेमा ४४ रनको साझेदारी गरेका थिए ।
बलिङमा पपुवा न्युगिनीका कबुअ मोरेअले ३, रिले हेकुरेले २ नोर्मन भानुअले १ विकेट लिएका थिए ।रासस
