(महेन्द्र प्रताप सिंह) बाँके । प्रहरीले जङ्गलबाट पेस्तोल र ४ राउण्ड गोलीसहित प्रहरीले एक जनालाई पक्राउ गरेको छ। पक्राउ पर्नेमा ३२ वर्षीय त्रिभुवन बैठा रहेका छन् ।प्रदेश प्रहरी कार्यालय जनकपुर र ईलाका प्रहरी कार्यालय केशरगंजबाट संयुक्त रुपमा खटिएको प्रहरी गस्ती टोलीले सर्लाहीको चन्द्रनगर गाउँपालिका २ का ३२ वर्षीय बैठालाई हतियारसहित पक्राउ गरेको हो ।
बाँके जङ्गलस्थित ईश्वरपुर नगरपालिका १२, कालिन्जोर चोकमा बीआर ३० जेड ६५४८ नम्वरको भारतीय मोटरसाइकल रोकेर खानतलासी लिँदा चालक बैठाको साथबाट मेडइन यूएसए लेखिएको एक थान पेस्तोल, त्यसमा लाग्ने चार राउण्ड गोली र एक थान म्यागजिन बरामद भएको जिल्ला प्रहरी कार्यालय सर्लाहीले जनाएको छ ।
मोटरसाइकल पछाडि सवार व्यक्ति भने फरार भएका छन् । उनको खोजी भइरहेको प्रहरीले जनाएको छ । पक्राउ परेका बैठासँग थप अनुसन्धान भइरहेको प्रहरीले जानकारी दिएको छ ।
