पर्सा । पटेर्वासुगौली गाउँपालिका–५ देउरियाबाट प्रहरीले ९ किलो ९ सय ग्राम लागुऔषध चरेस बरामद गरेको छ। शुक्रबार राति करिब पौने ९ बजे इलाका प्रहरी कार्यालय पटेर्वासुगौलीका प्रहरी निरीक्षक प्रकाश थापाको नेतृत्वमा खटिएको गस्ती टोलीले गहुँखेतमा फालिएको अवस्थामा उक्त लागुऔषध फेला पारेको हो।
प्रहरी निरीक्षक थापाका अनुसार गस्तीका क्रममा मोटरसाइकलमा आएका एक अपरिचित व्यक्तिले गहुँखेतमा बोराको पोका फालेर मोटरसाइकलमै भागेका थिए। बोराको पोका खोलेर हेर्दा १८ वटा साना पोकामा चरेस रहेको र नापतौल गर्दा ९ किलो ९ सय ग्राम रहेको पुष्टि भएको छ।
चरेस कसको हो र कहाँ लग्न खोजिएको थियो भन्नेबारे अनुसन्धान जारी रहेको प्रहरी निरीक्षक थापाले जानकारी दिएका छन्। यस घटनाले लागुऔषध तस्करीका गतिविधिहरूप्रति थप सतर्कता आवश्यक रहेको संकेत गरेको छ।
