ABC (क्राईमबिट)
लमजुङ । प्रहरीले एकै रात २ ठाउँबाट नगद २ लाख ८१ हजार १ सय २५ रुपैयाँसहित ३८ जना जुवाडेलाई पक्राउ गरेको छ ।
विभिन्न ठाउँमा जुवा (कौडा) भइरहेको सूचनाको आधारमा जिल्ला प्रहरी कार्यालय लमजुङ र इलाका प्रहरी कार्यालय भोटेओडारबाट खटिएको संयुक्त प्रहरी टोलीले कौडा थान ३२ सहित नगद र जुवाडे पक्राउ गरेको प्रहरीले जनाएको छ ।
शुक्रबार राति करिब ११ बजेको समयमा बेंसीसहर नगरपालिका ११ चिती तिनपिप्ले बस्ने ५७ वर्षीय गणेशप्रसाद श्रेष्ठको घरमा हार जितको बाजी राखी जुवा (कौडा) खेल्दै गरेको अवस्थामा घरधनी श्रेष्ठसहित २५ जना पुरुषलाई नगद १ लाख २१ हजार २५ रुपैयाँ र १६ थान कौडासहित पक्राउ गरिएको डीएसपी प्रकाश श्रीमलले बताए । उनका अनुसार पक्राउ पर्नेहरु सबै उक्त वडाकै रहेका छन् ।
यस्तै, शुक्रबार राति नै सुन्दरबजार नगरपालिका १ कुन्छा बस्ने ४४ वर्षीय रामबहादुर दुराले जुवा (कौडा) खेलाउँदै गरेको अवस्थामा उनीसहित १३ जना पुरुषलाई नगद १ लाख ६० हजार १ सय २५ रुपैयाँसहित पक्राउ गरिएको प्रहरीले जनाएको छ । पक्राउ पर्नेमा १२ जना सुन्दरबजार नगरपालिकाका रहेका र १ जना तनहुँको रहेका प्रहरीले जनाएको छ ।
जिल्ला प्रहरी कार्यालयका सूचना अधिकारी इन्सपेक्टर जगदिश रेग्मीले पक्राउ परेका व्यक्तिहरुविरुद्ध मुलुकी अपराध संहिता २०७४ को जुवा खेल्न वा सट्टाबाजी गर्न नहुने सम्बन्धी कसुर अन्तर्गत अनुसन्धान भइरहेको बताए । ‘आज (शनिबार) बिदाको दिन पर्यो । हामी भोलि (आइतबार) म्याद थप गरी थप अनुसन्धान थाल्छौं,’ उनले भने ।
