(ABC-Sanchar)
काठमाडौँ । चिकित्सा क्षेत्रको सुधारसहित विभिन्न ७ माग राखी ९ दिनदेखि आमरण अनसन बसेका डा.गोविन्द केसीलाई उपचारका लागि शिक्षण अस्पतालमा भर्ना गरिएको छ।
स्वास्थ्य स्थिति जटिल हुँदै गएपछि धनगढीबाट श्री एयरलायन्सको नियमित उडानबाट बुधबार साँझ उनी काठमाडौँ आएका थिए।
धनगढीमा अनसन बसिरहेको डा.केसीले आफ्नै खर्चमा केही स्वास्थ्यकर्मीसहित काठमाडौँ आएको उनका सहयोगी प्रितम सुवेदीले जानकारी दिए।
उनी अहिले त्रिवि शिक्षण अस्पतालमा थप उपचारका लागि भर्ना भएका हुन्।
डा। केसी आफ्ना शुभचिन्तकको आग्रहमा आफैँले टिकट काटेर काठमाडौं आउन तयार भएका हुन्। राज्यलाई कुनै पनि भार नपार्ने भन्दै यसअघि उनलाई लिन गएको नेपाली सेनाको स्काइ ट्रकमा उनी आउन मानेका थिएनन्।
मङ्गलवार दिउँसो गृह मन्त्रालयले सेनाको स्काई ट्रक धनगढी पठाए पनि उनी आउन नमानेपछि रित्तै फर्किएको थियो।
धनगढीमा १० दिनदेखि अनसनरत डाक्टर गोविन्द केसीको स्वास्थ्य अवस्था जटिल बन्दै गएपछि उनलाई थप उपचारका लागि काठमाडौँ रिफर गरिएको हो।
बुधबार सेती प्रादेशिक अस्पतालले एक विज्ञप्ति जारी गर्दै लामो समयसम्म भोकै बस्दा उनको स्वास्थ्यमा गम्भीर समस्या आएकोले उपचारका लागि काठमाडौँस्थित त्रिवि शिक्षण अस्पताल महाराजगञ्ज रेफर गरिएको जनाएको छ।
धनगढीबाट अपराह्न ५ बजेको श्री एयरलाइन्सको नियमित उडानबाट उनी काठमाडौं आएका हुन्।
सेती प्रादेशिक अस्पतालका डाक्टर शेरबहादुर कमरका अनुसार डाक्टर केसीको शरीरमा पोषणतत्व र पानीको असन्तुलनले बेहोस हुनसक्ने र थप गम्भीर स्थिति देखापर्ने भन्दै तत्काल थप उपचार आवश्यक देखिएको हो।
त्यस्तै उनको पेटमा कडा खालको अल्सर भई रक्तस्राव भएको आंशकासमेत उनले गरेका छन्।
अनसन बसेको तेस्रो दिनबाट डा.केसीको स्वास्थ्यमा समस्या देखा पर्न थालेको थियो। स्वास्थ्यमा समस्या देखिएपछि उनलाई सेती प्रादेशिक अस्पतालमा राखिएको थियो।
भोकै बस्दा स्वास्थ्यमा समस्या आएको र समयमै स्वास्थ्यको ख्याल गर्न उनलाई अस्पताल प्रशासनले सुझाव दिएको थियो।
तर, केसीले मुखबाट पानी र नसाबाट रिडगर ल्याक्टेट बाहेक अन्य कुरा नलिने अडान लिएकाले उनको स्वास्थ्यमा गम्भीर समस्या देखिएको डाक्टर कमरले बताए।
मेडिकल क्षेत्रको सुधारसहित विभिन्न ७ बुँदे माग राख्दै धनगढीको लक्ष्मीनारायण मन्दिरमा डा.केसी गत सोमबारदेखि आमरण अनसनमा थिए।
