नेपाल राष्ट्र बैंकको गभर्नरको लागि ३ जनाको नाम सिफारिस

काठमाडौं नेपाल राष्ट्र बैंकको गभर्नरका लागि ३ जनाको नाम सिफारिस गरिएको छ। अर्थमन्त्री डा. युवराज खतिवडाको संयोजकत्वमा गठित सिफारिस समितिले डा. राजन खनाल, महाप्रसाद अधिकारी र चिन्तामणि सिवोकाटीको नाम सिफारिस गरेर मन्त्रिपरिषदमा पठाएको हो। स्रोतका अनुसार आजै गभर्नर नियुक्ति गर्नका लागि अर्थमन्त्री खतिवडाले मन्त्रिपरिषद्मा प्रस्ताव लैजाने तयारी गर्नुभएको छ। प्रधानमन्त्रीले चाहेमा आजै दिउँसो बस्ने मन्त्रिपरिषद् बैठकले राष्ट्र बैंक गभर्नर नियुक्त गर्नेछ। सिफारिसमा परेका खनाल अर्थमन्त्रालयका पूर्वसचिव हुनुहुन्छ भने शिवाकोटी राष्ट्र बैंकका डेपुटी गभर्नर हुनुहुन्छ। शिवाकोटी अहिले राष्ट्र बैंकको कामु गभर्नरको रूपमा कार्यरत हुनुहुन्छ। अधिकारी पनि राष्ट्र बैंकका पूर्वडेपुटी गभर्नर हुनुहुन्छ। हाल उहाँ लगानी बोर्डको प्रमुख कार्यकारी अधिकृत हुनुहुन्छ। अर्थमन्त्रीको संयोजकत्वमा गठन भएको समितिमा पूर्वसचिव कृष्णहरि बास्कोटा र पूर्वगभर्नर विजयनाथ भट्टराई सदस्य हुनुहुन्थ्यो।